शहीद स्मारक भवन नवा सजावट के संग वीर सेनानी मन ल समर्पित: भूपेश बघेल

शहीद स्मार​क म सेनानी स्वर्गीय श्री कमल नारायण शर्मा के प्रतिमा के अनावरण




अंजोर ए.। राजधानी रायपुर के शहीद स्मारक भवन ला गजब दिन बाद फेर नवा साज-सजावट के संग प्रदेश के मुखिया भूपेश बघेल जी ह लोकार्पित करे गिस। ये मउका म स्वतंत्रता संग्राम सेनानी स्वर्गीय श्री कमल नारायण शर्मा के प्रतिमा के अनावरण तको करे गिस अउ स्वतंत्रता संग्राम सेनानी पद्मश्री डॉ. महादेव प्रसाद पाण्डेय, श्री पन्नालाल पण्ड्या, स्वर्गीय श्री कमल नारायण शर्मा के भाई श्री चंद्रप्रकाश शर्मा, पुत्री श्रीमती सविता पाठक ल तको शॉल श्रीफल भेंट कर के सम्मानित करिन। 

मुख्यमंत्री ह जलसा म अपन विचार रखत किहिन के ये मोर सौभाग्य आए के स्वतंत्रता संग्राम सेनानी स्वर्गीय श्री कमल नारायण शर्मा के मूर्ति के अनावरण करे के मउका मिलिस। ये शहीद स्मारक भवन स्वतंत्रता संग्र्राम आंदोलन म योगदान देवइया महापुरूष मनके सुरता देवाही। जानबा होवय के राजधानी रायपुर के रजबंधा मैदान म बने शहीद स्मारक भवन ल सुविधा संपन्न बनाने खातिर आंतरिक-बाह्य विकास अउ सौंदर्यीकरण के काम करे हावय। जेमा आडिटोरियम 3 डी प्रोजेक्टर मैंपिंग के सुविधा, शहीद मनके लगभग 11 मिनट के लेजर शो भवन आगे हरेक सप्ताह देखाए जाही। भवन के भीतर 650 सीटर ऑटोमेटिक एयरकंडीशन हॉल अउ मंच के बीच म एकॉस्टिक डोम घलोक हावय। भवन के छत म टेरेस गार्डन हावय जिहा परिवार के संग अवइया लोगन मन खेलही। 

कार्यक्रम म राज्यसभा सांसद श्रीमती छाया वर्मा, रायपुर नगर निगम रायपुर के महापौर प्रमोद दुबे, विधायक सर्वश्री कुलदीप जुनेजा, विकास उपाध्याय, श्रीमती अनिता योगेन्द्र शर्मा, नगर निगम रायपुर के सभापति प्रफुल्ल विश्वकर्मा, नेताप्रतिपक्ष सूर्यकांत राठौर सहित निगम के पार्षदगण, कलेक्टर डॉ. बसवराजु एस., वरिष्ठ पुलिस अधीक्षक  आरिफ शेख, नगर निगम के आयुक्त शिव अनंत तायल, लोक निर्माण विभाग के प्रमुख अभियंता  डी.के.अग्रवाल के अलावा नगर के जनता मन जुरियाए रिहिन हाबे।

लोकप्रिय पोस्ट