अंजोर छत्तीसगढ़ी मासिक पत्र के जून-जुलाई अंक
https://drive.google.com/file/d/0B7svPVghA1gNcDVnUk5PNUdqUmc/view?usp=sharing
संसकिरति मंतरी बने के बाद गिरौदपुरी के दौरा
जैतखाम के लोकार्पण खातिर जुरियाबोन: दयाल दास जी
अंजोर.रायपुर। राज के संस्कृति अउ पर्यटन मंत्री सिरी दयालदास बघेल ह बाबा गुरू घासीदास के जनम अउ तपो भुइंया गिरौदपुरी धाम के दौरा करिन। संग म संसदीय सचिव अउ पामगढ़ के विधायक सिरी अम्बेश जांगड़े, बिलाईगढ़ के विधायक सिरी सनम जांगड़े मन तको रिहिन हाबे। 52 करोड़ रूपिया के लागत म बनत कुतुब मीनार ले तको ऊंचा जैतखाम के दरस करे के बाद ओमन किहिन के जैतखाम के लोकार्पण खातिर सतनामी समाज के परमुख अउ राज के मुखिया डॉ. रमन सिंह के गोठबात करबोन, गुरू बाबा के किरपा होही तव लघियात लोकार्पण के दिन तिथि तको आ जही।
ओमन आगू किहिन के राज सरकार ल गिरौदपुरी के विकास खातिर विकास प्राधिकरण बनाये के सुझाव देबोन संगे-संग यहू बात कहिन के गिरौदपुरी धाम ल देस के परमुख पर्यटन केन्द्र के रूप म विकसित करे जाही। गिरौदपुरी के मेला म हरेक बच्छर 10 लेे 12 लाख तक भगत आके बाबा के आसिस पाथे। छत्तीसगढ़ अंचल के सबो समाज के मनखे मनके अलावा आन राज के लोगन मन तको गुरू बाबा के दरस करे बर आथे। दरस करइया मन खातिर छाता पहाड़ लेे जोंक नदी के तिरे-तिर सुरतावा बनाये जाही। देस-विदेस ले अवइया पर्यटक मनला बाबा गुरू घासीदास के महिमा जनाये बर साहित्यिक पुस्तक के एक ठन पुस्तकालय तको बनवाय जाही।
कुतुब मनीर ले ऊंचा जैतखाम म जाके अंतस जुड़ाय के आस तो गजब दिन के हाबे लोगन मनला, फेर अगोरत-अगोरत जोजन परगे रिहिस। दयाल दास जी के मंत्री बने के बाद समाज के लोगन म फेर उम्मीद जागे हावय।
कांग्रेस प्रवक्ता अजय माकन जी लगाइस आरोप, एसआईटी जांच होना चाही
नान घोटाला के पइसा दिल्ली अउ नागपुर तको पहुंचे हावय
अंजोर.दिल्ली। राज के सबले बड़का घोटाला जेमा बड़े-बड़े अफसर मनके नाव उजागर होय हाबे। अब कांग्रेस के प्रवक्ता ह छत्तीसगढ़ मुखिया उपर आरोप लगावत काहत हाबे के ओमन 36 सौ करोड़ के चाऊर के घोटला करे हाबे। जेन म मुखिया के परवार वाले मनके हाथ हाबे। अऊ पूरा मामला के सुप्रीम कोर्ट के निगरानी म एसआईटी ले जांच होना चाही। ओमन आगू किहिन के नान घोटाला के पइसा दिल्ली अउ नागपुर (संघ मुख्यालय) म तको आए हाबे। सिरी माकन ह डायरी के मारफत ले बताइन अउ ओकर पन्ना ल मीडिया म बांटिस तको। ये मउका म छत्तीसगढ़ कांग्रेस अध्यक्ष भूपेश बघेल अउ नेता प्रतिपक्ष टी.एस. सिंहदेव तको मौजूद रिहिन हाबे।
घोटाला म सरकार के लिपापोती के पोल खोले खातिर अब प्रदेस कांग्रेस बाना बांधे हाबे। रायपुर ले दिल्ली तक घोटाला के गोहार परत हाबे कि अब राज के मुखिया ल कुरसी म रेहे के कोनो अधिकार नइये, इस्तीफा दे देना चाही।
गुरूजी मनला डिजिटल लॉकर बनाए के प्रशिक्षण
अंजोर.कर्वधा। जिला पंचायत कर्वधा म जिला के सबो हायर सेकेंड्री स्कूल अउ सबो कॉलेज के शिक्षक मनला डिजिटल इंडिया कार्यक्रम, राज्य अउ केन्द्र सासन के ई गवेर्नेस के जानकारी अउ डिजिटल लॉकर खोले के प्रसिक्षण दिये गिस। डिजिटल लॉकर के महत्ता के बारे म बताये गिस।
गांव वाले मनला तको डिजिटल इंडिया अउ मैपिंग के जानकारी दे गिस। बने बुता करइया पंचायत मनला संचालनालय कोति ले इनाम दे जाही। जिला के सबो सी.एस.सी. म विडियो उक के माध्यम ले ग्रामीण मनला ला सरकार के ई-गवर्नेंस सेवा के बारे म बताये गीस।
ये मउका म कलेक्टर पी.दयानंद ह जिला पंचायत म आयोजित प्रशिक्षण कार्यक्रम म बताइस के सहर अउ गांव के जनता के बीच एक डिजिटल फरक हाबे इही ल दूरिहाए खातिर डिजिटल इंडिया प्रोग्राम के प्रयोजना लाने गे हावय। सबो शिक्षक मन अपन-अपन स्कूल-कालेज के लइका अउ करमचारी मनके डिजिटल लॉकर बनावय। सबो लॉकर ल आधार नंबर अउ यूजर आईडी सहित प्रगति रिपोर्ट जिला कार्यालय म पठोवय। ओमन बताइन के डिजिटल इंडिया के वेबसाईड म आयोजित ऑनलाईन प्रश्नोत्तरी म स्कूली लइका मन जादा ले जादा भाग लेवाय। प्रतियोगित कक्षा छटवीं ले आंठवी अउ नौवी लेे बारहवीं कक्षा के लइका मन म होवथाबे। क्वीज के विसय साइबर सुरक्षा, साइबर नैतिकता एथिक्स रइही। राज सरकार के मुताबिक राज के 11 हजार ग्राम पंचायत डिजिटल ग्राम सभा, 107 ब्लाक मुख्यालय म लोक सेवा केंद्र अउ सार्वजनिक वितरण प्रणाली ले छत्तीसगढ़ म चलत 600 रासन दुकान ल तको ऑनलाइन करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।