स्मार्ट सिटी बनही रायपुर अउ बिलासपुर

केंद्र सरकार के स्मार्ट सिटी योजना म 98 सहर के नाव 

अंजोर.नई दिल्ली। केंद्र सरकार के स्मार्ट सिटी योजना के 98 सहर के नाव के घोसना होगे हाबे। जेमा छत्तीसगढ़ के रायपुर अउ बिलासपुर के नाव तको हाबे। जारी सूची म उत्तर प्रदेस के 13 सहर, तमिलनाडु के 12, महाराष्ट्र के 10, मध्य प्रदेस के 7 सहर, गुजरात अउ कर्नाटक के 6-6 सहर। अइसने पश्चिम बंगाल के 4 सहर, राजस्थान के 4 सहर सामिल हाबे। 
सहरी विकास मंत्रालय के मुताबिक देस म अबही सहरी आबादी 31 फीसदी हवय, फेर भारत के जीडीपी म हिस्सेदारी 60 फीसदी ले आगर हाबे। अइसे अनुमान हाबे के अवइया 15 साल म सहर के आबादी के जीडीपी म हिस्सेदारी 75 फीसदी होही। इही पाके स्मार्ट सहर बनाये के लक्ष्य रखे गे हवय। अब स्मार्ट सहर रायपुर, बिलासपुर के अलावा भोपाल, इंदौर, जबलपुर, ग्वालियर, सागर, सतना, उज्जैन, पोर्टब्लेयर, विशाखापट्नम, तिरुपति, काकीनाड़ा, पासीघाट, गुवाहाटी, मुजफ्फरपुर, भागलपुर, बिहार शरीफ, चंडीगढ़, नई दिल्ली म्युनिसिपल काउंसिल, पणजी, गांधीनगर, दीव, सिलवासा, गांधीनगर, अहमदाबाद, सूरत, बड़ोदरा, राजकोट, दाहोद, करनाल, फरीदाबाद, हिमाचल प्रदेश-धर्मशाला, झारखंड-रांची, कर्नाटक-मंगलुरु, बेलागाबी, शिवमोगा, हुबली-धारवाड़, तुमकुर, दवनेगरे, कोच्चि, लक्षद्वीप, कावारत्ती ह सवांगा करही।