डॉ. कलाम के नाव म स्कूल शिक्षा गुणवत्ता अभियान

अंजोर.रायपुर। छत्तीसगढ़ स्कूली शिक्षा विभाग ह भारत के पूर्व राष्ट्रपति डॉ. ए.पी.जे. अब्दुल कलाम के नाव म शिक्षा गुणवत्ता अभियान चलाही। ये अभियान म शिक्षा गुणवत्ता म बढ़ोतरी के प्रयास करे जाही। स्कूल के मूल्यांकन ग्रामसभा ले कराही, ग्रामसभा ल मूल्यांकन के बारे म सुझाव अउ मदद दे खातिर स्कूल शिक्षा विभाग के एक अधिकारी ल जूमेदारी देही। कहू एक ग्राम पंचायत म चार-पांच स्कूल होही तव आने-आने दिन ग्रामसभा करे जाही। ग्रामसभा के आयोजन खातिर विभाग डहर ले राज स्तर म मास्टर टे्रनर प्रशिक्षित करे जाही। जिला स्तर म तको कलेक्टर कोति ले अपन जिला के जनप्रतिनिधी मनके प्रशिक्षण के बेवस्था करे जाही। जिला कलेक्टर के अध्यक्षता म एक जिला स्तरीय शाला ग्रेडिंग समिति होही जेन हा समिति ग्रामसभा/नगरीय निकाय कोति ले मूल्यांकित स्कूल ल चार प्रकार के ग्रेडिंग- ए/बी/सी/डी ग्रेडिंग करही। सी अउ डी ग्रेडिंग वाला स्कूल के निरीक्षण मुख्यमंत्री, मंत्री, सांसद, विधायक मन करही। ये कार्यक्रम म पहली मास्टर ट्रेनर के प्रशिक्षण 2 सितंबर 2015 के होही। नामित अधिकारी अउ जिला/वि.खं. स्तरीय प्रशिक्षण 7 सितंबर ले 11 सितंबर तक होही। मूल्यांकन खातिर विसेस ग्रामसभा के आयोजन 16-17 सितंबर के होही। ग्रेडिंग संकलन के बुता ह 26 सितंबर तक होही। स्कूल के सूची अउ आवंटन 7 अक्टूबर तक होही। स्कूल निरीक्षण के पहिली चरन 8 अक्टूबर ले 15 अक्टूबर अउ दूसरा चरन 11 जनवरी ले 18 जनवरी 2016 के बीच होही।