व्हाईटनर, बोनफिक्स अउ सुलेसन बेचइया उपर होही कड़ा कार्रवाई

अंजोर.रायगढ़। व्हाईटनर, बोनफिक्स अउ टायर पंचर ल चिपकाए के सुलेशन के उपयोग छोटे-छोटे लइका मन नसा खातिर करत हाबे। ये बात के सिकायत उपर बने जिकर करत रायगढ़ कलेक्टर सबो एसडीएम ल अपन-अपन ईलाका के दुकान मनके जांच करे के निर्देस दे हावय। कलेक्टर केहे हाबे के स्टेशनरी आईटम व्हाईटनर ल सिरिफ स्टेशनरी दुकानदार ह बेचही उहू ह बड़े मनला दिही। किराना दुकान अऊ आन दुकान म येकर बिक्री के प्रतिबंध लगाये के निर्देस दे हावय। अगर कहू किराना दुकान या आन दुकान म जांच करत व्हाईटनर अउ बोनफिक्स मिलही तब दुकानदार उपर कार्रवाई करे जाही। सुलेशन के बिक्री खातिर ओमन किहिन के येहा पंचर टायर ल बनाये के काम म आथे तव येकर बिक्री ऑटोमोबाईल दुकान के अलावा अऊ आन दुकान म नइ होना चाही। 
रायगढ़ कलेक्टर ह सबो एसडीएम ल अपन-अपन इलाका के दुकान वाले मनला समझाइस दे बर केहे हाबे काबर के घूमइया-फिरइया छोटे लइका मन येकर बोनफिक्स, व्हाईटनर, सुलेशन बिसा के ओकर उपयोग नसा खातिर करथे। ये कार्रवाई ले सबो पालक मन खुस हाबे काबर के अब नान्हे लइका मनके भविस सुधरही जेन मन नसा कोति ढकलावत जात रिहिस हाबे। अइसन फइसला तो राज के सबो जिला म होना चाही काबर के ये जिनिस मन कमती पइसा म कोनो भी दुकान म आसानी ले मिल जथे।