चुनई बुता के कर्मचारी अनुग्रह राशि जारी

'' आयोग डहर ले निर्वाचन बुता करत बखत कोनो अधिकारी-कर्मचारी या सुरक्षा जवान के मउत या दुर्घटना म घायल होय म अनुग्रह राशि प्रदान करे जाथे। निर्वाचन काम करत बखत नक्सली घटना समेत आन दुर्घटना अउ स्वाभाविक मउत म तको अनुग्रह राशि दे जाथे।''

छत्तीसगढ़। छत्तीसगढ़ के विधानसभा चुनई म लगे कर्मचारी मन उपर बिते दिन बीजापुर म नक्सली हमला होय रिहिस। जेमा पुलिस के जवान के अलावा पत्रकार अउ आम नागरिक मरे रिहिस। मुख्य निर्वाचन अधिकारी सुब्रत साहू कोति ले ​जारी होय जानकारी के मुताबिक शहीद के परिवार वाले मन ला 20 लाख अउ घायल मन ला 10-10 लाख जारी होय हाबे जेन कलेक्टर के कार्फत भेजे जाही। जानबा होवय के राशि ह सरकार कोति ले जारी राशि ले अलग हावय। 

27 अक्टूबर के बीजापुर म होय नक्सली हमला म शहीद सर्वश्री जवान मीर मतीउर रहमान, ब्रज मोहन बेहरा, चट्टी प्रवीण, गुल्ली पल्ली श्रिनु के अलावा 30 अक्टूबर दंतेवाड़ा नक्सली हमला म शहीद उपनिरीक्षक सर्वश्री रूद्रप्रताप सिंह, मंगलु मंडावी, राकेश कुमार कौशल, कैमरामैन अच्युतानंद साहू। अइसने दंतेवाड़ा म 8 नवंबर के नक्सली हमला म मरे ड्राइवर नंदलाल पाटकर, सुशील कुमार बंजारे, रोशन कुमार साहू, जोहन नायक के आश्रित परिजन ल 20-20 लाख रूपए अनुग्रह राशि निर्वाचन आयोग डहर ले जारी होगे हावय।