सरकारी नौकरी म भर्ती शुरू, खाली पद ल भरही अब नवा सरकार

अंजोर। छत्तीसगढ़ म मुख्यरमंत्री भूपेश बघेल के सरकार ह अपन वादा के मुताबिक काम करत अब राज के बेरोजगार युवा मन खातिर सरकारी नौकरी के दुवारी खोल दे हावय। मिले जानकारी के मुताबिक लोक सेवा आयोग के माध्यम ले राज्य के शासकीय महाविद्यालय म खाली 40 प्रतिशत सहायक प्राध्यापक के पद ल भरे के घोसना होय हाबे। जेमा राजभर म 27 विषय के 1384 सहायक प्राध्यापक के भरती होही। अइसने स्कूल शिक्षा विभाग म घलोक 15 हजार शिक्षक के भरती होही। 

लोक सेवा आयोग डहर ले सीएमओ के 35 पद, आयुर्वेदिक व्याख्याता के 17 पद, योजना अउ आर्थिक संख्याकिकी विभाग के सहायक संचालक के 10 पद के संगे-संग सिविल जज के 39 पद म भरती के प्रक्रिया चलत हावय।

इही रकम ले स्वास्थ्य सेवाऐं संचालनालय कोति ले 788 स्टाफ नस के भरती के प्रक्रिया सुरू कर दे गे हावय। जेमा रायपुर संभाग 238, बिलासपुर संभाग 128, सरगुजा संभाग 210 अउ बस्तर संभाग म 212 पद के भरती करे जाही। 

अइसने छत्तीसगढ़ व्यावसायिक परीक्षा मंडल तको आने आने पद बर 424 पद के भरती के आवदेन निकाले हावय। जेकर अवइया महीना म 506 पद खातिर परीक्षा तको होवइया हावय। व्यापम आने-आने विभाग के सहायक रजिस्ट्रार, हार्डवेयर इंजीनियर, सॉफ्टवेयर इंजीनियर, सहायक प्रोग्रामर, उपअभियंता (सिविल), उपअभियंता (विद्युत यांत्रिकी), उप प्रबंधक (वानिकी), सहायक ग्रेड-3, सूचना सहायक-ग्रेड 1, सूचना सहायक ग्रेड-2, डाटाएन्ट्री ऑपरेटर, सहायक लाईब्रेरियन, लाईब्रेरी सहायक, ट्रांसलेटर अनुवादक, सहायक ग्रेड-3, सहायक ग्रेड-3(कम्प्यूटर) उक के खाली 424 पद ल परीक्षा के माध्यम ले भरही।

येकर पाछू छत्तीसगढ़ व्यावसायिक परीक्षा मण्डल स्वास्थ्य सेवाओं के तहत लैब टेक्नीशियन के 228 पद, रेडियोग्राफर के 21 पद, राजस्व विभाग म पटवारी के 250 पद, खादी अउ ग्रामोद्योग बोर्ड म सहायक संचालक के 3 अउ निरीक्षक के 4 पद खातिर परीक्षा आयोजित करही।